Sum kunnugt er nú boðað frá, at allir næmingar koma í skúla aftur. Hetta skal gerast skjótast gjørligt, og á Skúlatrøð byrjar skúlagongdin hjá øllum næmingunum mánadagin 18. mai kl. 8:00. Vit fara í skúla eftir vanligu tímatalvuni, t.v.s. tímatalvuni, vit høvdu fram til 12. mars. Tit skulu møta í vanligu floksstovuni. Hóast gingið verður eftir vanligu tímatalvuni, eru tó ávísar tillagingar í samband við tilmælini um korona.
Handaverk&list í 4. – 7. flokki og allar vallærugreinarnar og breytir í 8. - 10. flokki uttan alis-/evnafrøði verður í stóran mun avlýst. Í nøkrum árgangum verða tímar fluttir fram, har handaverk&list eigur at verða. Í hesum sambandi skulu viðkomandi lærarar møguliga lesa aðrar tímar. Tillagaðu tímatalvurnar eru viðfestar. Tit mugu kunna tykkum um broytingarnar, og flokslærarin kunnar um hetta á heimasetninginum.
Flokkarnir skulu halda seg til heimastovuna, og ikki fara í fakhølini, sum t.d. evningstovuna, tónleikastovuna og ítróttahallirnar.
Tilmælið um handreinføri er eins og tað hevur verið. Øll skulu vaska hendur, tá ið tey koma í skúla og í samband við fríkorter og matarsteðg. Hetta skal verða gjørt í floksstovunum, har tað er møguligt, og annars á tilhoyrandi vesum.
Tað verða ikki hildnar samlingar tvørturum flokkar, sum t.d. morgunsangur. Vegna møguliga smittusporan skulu flokkarnir eisini koma so lítið í samband við aðrar flokkar sum møguligt. Tí verða tímarnir í ítrótti hildnir floksvís og ikki í bólkum. Hesir tímar skulu helst verða hildnir úti.
