Heystið og royniberini - heystfrí
Heystfrí, men ongin orsøk til keðsemi
Heystfrítíðin kann vera ógvuliga hendingarrík, hóast vit ikki eru í skúla. Í heystfrítíðini verða fjøllini gingin, og tað verður flett. Her hava fleiri av okkum møguleika at verða við.
En annar møguleiki er at fara á Savnsfagnað, har evnið í ár er piss. Piss er nevniliga eitt ógvuliga áhugavert evni, sum granskað verður í. Piss kann siga okkum rættiliga nógv um nógv.
Eitt spennandi tiltak er á Klaksvíkar bókasavni, har skipað verður fyri lesimarathon. Øll børn í skúlaaldri eru vælkomin á Klaksvíkar bókasavn týsdagin 11. okt kl. 14 at lesa. Tá tú hevur lisið 42 síður og 2 reglur í eini bók, tú hevur við sjálvur ella lænt, hevur tú lisið eitt marathon, og tú fært eitt skreytblað – eitt diplom.
Vit kunnu eisini finna okkum ein góðan krók og lesa eina góða bók ella møguliga lurta eftir onkrum góðum hoyrispæli, til dømis Søgan um Sigmund, sum liggur á heimasíðuni hjá KVF, og sum tú eisini finnur her.
Um heystið síggja vit vøkru royniberini á roynitrøunum, og eru vit heppin, so kunnu vit eisini síggja fuglin reyðstapa, sum dámar væl at sita í trøunum og eta royniber. Kanska tú sært ein reyðstapa í heystfrítíðini?
Sum tit síggja, so er ongin orsøk at keða seg. Vit síggjast aftur mánamorgunin 17. oktobur kl. 08:00
Skúlin vil ynskja øllum eina góða heystferiu.