Skúlahornorkestrið hevur havt venjingardag

Í samband við, at Klaksvíkar hornorkestur bleiv 75 ár 5. mai, verður ein konsert í Varpinum  30. mai, undir leiðslu av Fionu Parker, og í dag hevur skúlahornorkestrið, sum eisini er ein partur av Klaksvíkar hornorkestri, havt venjingardag.

Viðurkendi tónasmiðurin innan horntónleik, skotin Alan Fernie verður serligur gestur til konsertina í Varpinum, og næmingarnir í skúlahornorkestrinum vóru so hepnir, at hann eisini var við til venjingardagin á Skúlatrøð.

Skúlahornorkestrið vandi allan fyrrapartin og bjóðaði so flokkunum í miðdeild til konsert, áðrenn dagurin endaði og øll fóru í vikuskifti.

Her síggja tit ein væl upplagdan orkesturleiðara og eitt væl upplagt orkestur. Vit takka fyri eina góða konsert.

Vit hava sett nøkur brot saman frá konsertini í morgun.

Við myndum og video vilja vit ynskja tykkum eitt gott vikuskifti og eina góða norðoyastevnu.