Bananir í pyamas... nei, tvætl
10. mai 2021
Góði angin rakk langt út í gongina. Komin inn í køkin arbeiddu næmingar í 5. flokki við at gera bananrullukaku. Nøkur skóru bananir, onnur pískaðu og upp aftur onnur kannaðu, um tað í ovninum var klárt. Eisini skuldi sukur leggjast á bakipappír, og ein gekk smílandi og sang Bananir í pyamas.
Hetta gekk heilt væl og kakan smakkaði frálíka væl. So um tú hevur hug at royna at gera banankaku, so er uppskriftin úr bókini Góðaráð hjá Jonhild Henriksen niðanfyri.
Tilar
3 egg
175 g sukur
35 g eplamjøl
1 súpsk. hveitimjøl
1 ½ súpsk. kakao
1 tesk. bakipulvur
Fylla
1/4 rómi
3 bananir
Ger soleiðis
- Píska eggini og sukrið væl.
- Sálda mjølið, kakao og bakipulvurið og rør alt væl saman.
- Legg bakipappír ella smyr og legg matpappír á eina bakaraovnsplátu og smyr deiggið á.
- Hita ovnin til 200* og baka mitt í ovninum í 8 minuttir.
- Tá ið kakan er bakað, verður hon vend út á sukurstoytt pappír, og eitt viskustykki verður vundið upp úr heitum vatni og lagt omaná.
- Píska róman, meðan kakan kólnar.
- Tak viskustykkið og pappírið av, tá ið kakan er køld, og smyr róman á hana.
- Sker bananir í flísar og legg tær á og rulla kakuna væl saman.
Væl gagnist :)